梵本 真實名經（誦妙吉祥勝義名）精校最終版

ratnanga

|| mañjuśrījñānasattvasya sarvatathāgatajñānakāyasya jñānamūrteradvayaparamārthā nāmasaṃgītiḥ ||

|| namo mañjuśrīkumārabhūtāya ||

atha vajradharaḥ śrīmān durdāntadamakaḥ paraḥ /

trilokavijayī vīro guhyarāṭ kuliśeśvaraḥ //

vibuddhapuṇḍarīkākṣaḥ protphullakamalānanaḥ /

prollālayan vajravaraṃ svakareṇa muhur muhuḥ //

bhṛkuṭītaraṅgapramukhair anantair vajrapāṇibhiḥ /

durdāntadamakair vīrair vīrabībhatsarūpibhiḥ //

ullālayadbhiḥ svakaraiḥ prasphuradvajrakoṭibhiḥ /

prajñopāyamahākaruṇājagadarthakaraiḥ paraiḥ //

hṛṣṭatuṣṭāśayair muditaiḥ krodhavigraharūpibhiḥ /

buddhakṛtyakarair nāthaiḥ sārdhaṃ praṇatavigrahaiḥ //

praṇamya nāthaṃ saṃbuddhaṃ bhagavantaṃ tathāgatam /

kṛtāñjalipuṭo bhūtvā idam āha sthito 'grataḥ //

maddhitāya mamārthāya anukampāya me vibho /

māyājālābhisaṃbodher yathā lābhī bhavāmy aham //

ajñānapaṅkamagnānāṃ kleśavyākulacetasām /

hitāya sarvasattvānām anuttaraphalāptaye //

prakāśayatu saṃbuddho bhagavān śāstā jagadguruḥ /

mahāsamayatattvajña indriyāśayavit paraḥ //

bhagavajjñānakāyasya mahoṣṇīṣasya gīṣpateḥ /

mañjuśrījñānasattvasya jñānamūrteḥ svayaṃbhuvaḥ //

gambhīrārthām udārārthāṃ mahārthām asamāṃ śivām /

ādimadhyāntakalyāṇīṃ nāmasaṃgītim uttamām //

yātītair bhāṣitā buddhair bhāṣiṣyante hy anāgatāḥ /

pratyutpannāś ca saṃbuddhā yāṃ bhāṣante punaḥ punaḥ //

māyājālamahātantre yā cāsmiṃ saṃpragīyate /

mahāvajradharair hṛṣṭair ameyair mantradhāribhiḥ //

ahaṃ caināṃ dhārayiṣyāmy ā niryāṇād dṛḍhāśayaḥ /

yathā bhavāmy ahaṃ nātha sarvasaṃbuddhaguhyadhṛk //

prakāśayiṣye sattvānāṃ yathāśayaviśeṣataḥ /

aśeṣakleśanāśāya aśeṣājñānahānaye //

evam adhyeṣya guhyendro vajrapāṇis tathāgatam /

kṛtāñjalipuṭo bhūtvā prahvakāyasthito 'grataḥ //

[ adhyeṣaṇāgāthāḥ ṣoḍaśa ]

atha śākyamunir bhagavān saṃbuddho dvipadottamaḥ /

nirṇamayyāyatāṃ sphītāṃ svajihvāṃ svamukhāc chubhām //

smitaṃ saṃdarśya lokānām apāyatrayaśodhanam /

trailokyābhāsakaraṇaṃ caturmārāriśāsanam //

trilokam āpūrayantyā brāhmyā madhurayā girā /

pratyabhāṣata guhyendraṃ vajrapāṇiṃ mahābalam //

sādhu vajradharaḥ śrīmān sādhu te vajrapāṇaye /

yas tvaṃ jagaddhitārthāya mahākaruṇayānvitaḥ //

mahārthāṃ nāmasaṃgītiṃ pavitrām aghanāśanīm /

mañjuśrījñānakāyasya mattaḥ śrotuṃ samudyataḥ //

tat sādhu deśayāmy eṣa ahaṃ te guhyakādhipaḥ /

śṛṇu tvam ekāgramanās tat sādhu bhagavann iti //

[ prativacanagāthāḥ ṣaṭ ]

atha śākyamunir bhagavān sakalaṃ mantrakulaṃ mahat /

mantravidyādharakulaṃ vyavalokya kulatrayam //

lokalokottarakulaṃ lokālokakulaṃ mahat /

mahāmudrākulaṃ cāgryaṃ mahoṣṇīṣakulaṃ mahat //

[ ṣaṭkulāvalokanagāthe dve ]

imāṃ ṣaḍmantrarājānaṃ saṃyuktām advayodayām /

anutpādadharmiṇīṃ gāthāṃ bhāṣate sma girāṃ pateḥ //

a ā i ī u ū e ai o au aṃ aḥ sthito hṛdi |

jñānamūrtir ahaṃ buddho buddhānāṃ tryadhvavartinām ||

oṃ vajratīkṣṇaduḥkhacchedaprajñājñānamūrtaye |

jñānakāyavāgīśvara arapacanāya te namaḥ ||

[ māyājālābhisaṃbodhikramagāthās tisraḥ ]

tadyathā bhagavān buddhaḥ saṃbuddho 'kārasaṃbhavaḥ /

akāraḥ sarvavarṇāgryo mahārthaḥ paramākṣaraḥ //

mahāprāṇo hy anutpādo vāgudāhāravarjitaḥ /

sarvābhilāpahetvagryaḥ sarvavāksuprabhāsvaraḥ //

mahāmahamahārāgaḥ sarvasattvaratiṃkaraḥ /

mahāmahamahādveṣaḥ sarvakleśamahāripuḥ //

mahāmahamahāmoho mūḍhadhīmohasūdanaḥ /

mahāmahamahākrodho mahākrodharipur mahān //

mahāmahamahālobhaḥ sarvalobhanisūdanaḥ /

mahākāmo mahāsaukhyo mahāmodo mahāratiḥ //

mahārūpo mahākāyo mahāvarṇo mahāvapuḥ /

mahānāmā mahodāro mahāvipulamaṇḍalaḥ //

mahāprajñāyudhadharo mahākleśāṅkuśo 'graṇīḥ /

mahāyaśā mahākīrtir mahājyotir mahādyutiḥ //

mahāmāyādharo vidvān mahāmāyārthasādhakaḥ /

mahāmāyāratirato mahāmāyendrajālikaḥ //

mahādānapatiḥ śreṣṭho mahāśīladharo 'graṇīḥ /

mahākṣāntidharo dhīro mahāvīryaparākramaḥ //

mahādhyānasamādhistho mahāprajñāśarīradhṛk /

mahābalo mahopāyaḥ praṇidhir jñānasāgaraḥ //

mahāmaitrīmayo 'meyo mahākāruṇiko 'gradhīḥ /

mahāprājño mahādhīmān mahopāyo mahākṛtī //

mahāṛddhibalopeto mahāvego mahājavaḥ /

maharddhiko maheśākhyo mahābalaparākramaḥ //

mahābhavādrisaṃbhettā mahāvajradharo ghanaḥ /

mahākrūro mahāraudro mahābhayabhayaṃkaraḥ //

mahāvidyottamo nātho mahāmantrottamo guruḥ /

mahāyānanayārūḍho mahāyānanayottamaḥ //

[ vajradhātumahāmaṇḍalagāthāś caturdaśa ]

ratnanga

mahāvairocano buddho mahāmaunī mahāmuniḥ /

mahāmantranayodbhūto mahāmantranayātmakaḥ //

daśapāramitāprāpto daśapāramitāśrayaḥ /

daśapāramitāśuddhir daśapāramitānayaḥ //

daśabhūmīśvaro nātho daśabhūmipratiṣṭhitaḥ /

daśajñānaviśuddhātmā daśajñānaviśuddhadhṛk //

daśākāro daśārthārtho munīndro daśabalo vibhuḥ /

aśeṣaviśvārthakaro daśākāravaśī mahān //

anādhir niṣprapañcātmā śuddhātmā tathatātmakaḥ /

bhūtavādī yathāvādī tathākārī ananyavāk //

advayo 'dvayavādī ca bhūtakoṭivyavasthitaḥ /

nairātmyasiṃhanirnādaḥ kutīrthyamṛgabhīkaraḥ //

sarvatrago 'moghagatis tathāgatamanojavaḥ /

jino jitārir vijayī cakravartī mahābalaḥ //

gaṇamukhyo gaṇācāryo gaṇeśo gaṇapatir vaśī /

mahānubhāvo dhaureyo 'nanyaneyo mahānayaḥ //

vāgīśo vākpatir vāgmī vācaspatir anantagīḥ /

satyavāk satyavādī ca catuḥsatyopadeśakaḥ //

avaivartiko hy anāgāmī khaḍgaḥ pratyekanāyakaḥ /

nānāniryāṇaniryāto mahābhūtaikakāraṇaḥ //

arhan kṣīṇāsravo bhikṣur vītarāgo jitendriyaḥ /

kṣemaprāpto 'bhayaprāptaḥ śītībhūto hy anāvilaḥ //

vidyācaraṇasaṃpannaḥ sugato lokavitparaḥ /

nirmamo nirahaṃkāraḥ satyadvayanaye sthitaḥ //

saṃsārapārakoṭisthaḥ kṛtakṛtyaḥ sthale sthitaḥ /

kaivalyajñānaniṣṭhyūtaḥ prajñāśastro vidāraṇaḥ //

saddharmo dharmarāḍ bhāsvāṃ lokālokakaraḥ paraḥ /

dharmeśvaro dharmarājā śreyomārgopadeśakaḥ //

siddhārthaḥ siddhasaṃkalpaḥ sarvasaṃkalpavarjitaḥ /

nirvikalpo 'kṣayo dhātur dharmadhātuḥ paro 'vyayaḥ //

puṇyavān puṇyasaṃbhāro jñānaṃ jñānākaraṃ mahat /

jñānavān sadasajjñānī saṃbhāradvayasaṃbhṛtaḥ //

śāśvato viśvarāḍ yogī dhyānaṃ dhyeyo dhiyāṃpatiḥ /

pratyātmavedyo hy acalaḥ paramādyas trikāyadhṛk //

pañcakāyātmako buddhaḥ pañcajñānātmako vibhuḥ /

pañcabuddhātmamakuṭaḥ pañcacakṣur asaṅgadhṛk //

janakaḥ sarvabuddhānāṃ buddhaputraḥ paro varaḥ /

prajñābhavodbhavo 'yonir dharmayonir bhavāntakṛt //

ghanaikasāro vajrātmā sadyojāto jagatpatiḥ /

gaganodbhavaḥ svayaṃbhūḥ prajñājñānānalo mahān //

vairocano mahādīptir jñānajyotir virocanaḥ /

jagatpradīpo jñānolko mahātejāḥ prabhāsvaraḥ //

vidyārājo 'gramantreśo mantrarājā mahārthakṛt /

mahoṣṇīṣo 'dbhutoṣṇīṣo viśvadarśī viyatpatiḥ //

sarvabuddhātmabhāvāgryo jagadānandalocanaḥ /

viśvarūpī vidhātā ca pūjyo mānyo mahāṛṣiḥ //

kulatrayadharo mantrī mahāsamayamantradhṛk /

ratnatrayadharaḥ śreṣṭhas triyānottamadeśakaḥ //

amoghapāśo vijayī vajrapāśo mahāgrahaḥ /

vajrāṅkuśo mahāpāśo vajrabhairavabhīkaraḥ //

[ suviśuddhadharmadhātujñānagāthāḥ pādonapañcaviṃśatiḥ ]

krodharāṭ ṣaṇmukho bhīmaḥ ṣaḍnetraḥ ṣaḍbhujo balī /

daṃṣṭrākarālakaṅkālo halāhalaśatānanaḥ //

yamāntako vighnarāḍ vajravego bhayaṃkaraḥ /

vighuṣṭavajro hṛdvajro māyāvajro mahodaraḥ //

kuliśeśo vajrayonir vajramaṇḍo nabhopamaḥ /

acalaikajaṭāṭopo gajacarmapaṭārdradhṛk //

hāhākāro mahāghoro hīhīkāro bhayānakaḥ /

aṭṭahāso mahāhāso vajrahāso mahāravaḥ //

vajrasattvo mahāsattvo vajrarājo mahāsukhaḥ /

vajracaṇḍo mahāmodo vajrahūṃkārahūṃkṛtiḥ //

vajrabāṇāyudhadharo vajrakhaḍgo nikṛntanaḥ /

viśvavajradharo vajrī ekavajrī raṇaṃjahaḥ //

vajrajvālākarālākṣo vajrajvālāśiroruhaḥ /

vajrāveśo mahāveśaḥ śatākṣo vajralocanaḥ //

vajraromāṅkuratanur vajraromaikavigrahaḥ /

vajrakoṭinakhārambho vajrasāraghanacchaviḥ //

vajramālādharaḥ śrīmān vajrābharaṇabhūṣitaḥ /

hāhāṭṭahāso nirghoṣo vajraghoṣaḥ ṣaḍakṣaraḥ //

mañjughoṣo mahānādas trailokyaikaravo mahān /

ākāśadhātuparyanto ghoṣo ghoṣavatāṃ varaḥ //

[ ādarśajñānagāthāḥ pādonasārdhadaśa ]

ratnanga

tathatābhūtanairātmyaṃ bhūtakoṭir anakṣaraḥ /

śūnyatāvādivṛṣabho gambhīrodāragarjanaḥ //

dharmaśaṅkho mahāśabdo dharmagaṇḍī mahāraṇaḥ /

apratiṣṭhitanirvāṇo daśadigdharmadundubhiḥ //

arūpo rūpavān agryo nānārūpo manomayaḥ /

sarvarūpāvabhāsaśrīr aśeṣapratibimbadhṛk //

apradhṛṣyo maheśākhyas traidhātukamaheśvaraḥ /

samucchritāryamārgastho dharmaketur mahodayaḥ //

trailokyaikakumārāṅgaḥ sthaviro vṛddhaḥ prajāpatiḥ /

dvātriṃśallakṣaṇadharaḥ kāntas trailokyasundaraḥ //

lokajñānaguṇācāryo lokācāryo viśāradaḥ /

nāthas trātā trilokāptaḥ śaraṇaṃ tāyī niruttaraḥ //

gaganābhogasaṃbhogaḥ sarvajñajñānasāgaraḥ /

avidyāṇḍakośasaṃbhettā bhavapañjaradāraṇaḥ //

śamitāśeṣasaṃkleśaḥ saṃsārārṇavapāragaḥ /

jñānābhiṣekamakuṭaḥ samyaksaṃbuddhabhūṣaṇaḥ //

triduḥkhaduḥkhaśamanas tryanto 'nantas trimuktigaḥ /

sarvāvaraṇanirmukta ākāśasamatāṃgataḥ //

sarvakleśamalātītas tryadhvānadhvagatiṃgataḥ /

sarvasattvamahānāgo guṇaśekharaśekharaḥ //

sarvopadhivinirmukto vyomavartmani susthitaḥ /

mahācintāmaṇidharaḥ sarvaratnottamo vibhuḥ //

mahākalpataruḥ sphīto mahābhadraghaṭottamaḥ /

sarvasattvārthakṛt kartā hitaiṣī sattvavatsalaḥ //

śubhāśubhajñaḥ kālajñaḥ samayajñaḥ samayī vibhuḥ /

sattvendriyajño velajño vimuktitrayakovidaḥ //

guṇī guṇajño dharmajñaḥ praśasto maṅgalodayaḥ /

sarvamaṅgalamāṅgalyaḥ kīrtir lakṣmīr yaśaḥ śubhaḥ //

mahotsavo mahāśvāso mahānando mahāratiḥ /

satkāraḥ satkṛtir bhūtiḥ pramodaḥ śrīr yaśaspatiḥ //

vareṇyo varadaḥ śreṣṭhaḥ śaraṇyaḥ śaraṇottamaḥ /

mahābhayāriḥ pravaro niḥśeṣabhayanāśanaḥ //

śikhī śikhaṇḍī jaṭilo jaṭī mauñjī kirīṭimān /

pañcānanaḥ pañcaśikhaḥ pañcacīrakaśekharaḥ //

mahāvratadharo mauṇḍī brahmacārī vratottamaḥ /

mahātapās taponiṣṭhaḥ snātako gautamo 'graṇīḥ //

brahmavid brāhmaṇo brahmā brahmanirvāṇam āptavān /

muktir mokṣo vimokṣāṅgo vimuktiḥ śāntatā śivaḥ //

nirvāṇaṃ nirvṛtiḥ śāntiḥ śreyo niryāṇam antakaḥ /

sukhaduḥkhāntakṛn niṣṭhā vairāgyam upadhikṣayaḥ //

ajayo 'nupamo 'vyakto nirābhāso nirañjanaḥ /

niṣkalaḥ sarvago vyāpī sūkṣmo 'bījam anāsravaḥ //

arajo virajo vimalo vāntadoṣo nirāmayaḥ /

suprabuddho vibuddhātmā sarvajñaḥ sarvavitparaḥ //

vijñānadharmatātīto jñānam advayarūpadhṛk /

nirvikalpo nirābhogas tryadhvasaṃbuddhakāryakṛt //

anādinidhano buddha ādibuddho niranvayaḥ /

jñānaikacakṣur amalo jñānamūrtis tathāgataḥ //

vāgīśvaro mahāvādī vādirāḍ vādipuṃgavaḥ /

vadatāṃ varo variṣṭho vādisiṃho 'parājitaḥ //

samantadarśī prāmodyas tejomālī sudarśanaḥ /

śrīvatsaḥ suprabho dīptir bhā bhāsurakaradyutiḥ //

mahābhiṣagvaraḥ śreṣṭhaḥ śalyahartā niruttaraḥ /

aśeṣabhaiṣajyataruḥ kleśavyādhimahāripuḥ //

trailokyatilakaḥ kāntaḥ śrīmān nakṣatramaṇḍalaḥ /

daśadigvyomaparyanto dharmadhvajamahocchrayaḥ //

jagacchatraikavipulo maitrīkaruṇāmaṇḍalaḥ /

padmanarteśvaraḥ śrīmān ratnacchatro mahāvibhuḥ //

sarvabuddhamahātejaḥ sarvabuddhātmabhāvadhṛk /

sarvabuddhamahāyogaḥ sarvabuddhaikaśāsanaḥ //

vajraratnābhiṣekaśrīḥ sarvaratnādhipeśvaraḥ /

sarvalokeśvarapatiḥ sarvavajradharādhipaḥ //

sarvabuddhamahācittaḥ sarvabuddhamanogatiḥ /

sarvabuddhamahākāyaḥ sarvabuddhasarasvatiḥ //

vajrasūryo mahāloko vajrenduvimalaprabhaḥ /

virāgādimahārāgo viśvavarṇojjvalaprabhaḥ //

saṃbuddhavajraparyaṅko buddhasaṃgītidharmadhṛk /

buddhapadmodbhavaḥ śrīmān sarvajñajñānakośadhṛk //

viśvamāyādharo rājā buddhavidyādharo mahān /

vajratīkṣṇo mahākhaḍgo viśuddhaḥ paramākṣaraḥ //

duḥkhacchedamahāyāno vajradharmamahāyudhaḥ /

jinajig vajragāmbhīryo vajrabuddhir yathārthavit //

sarvapāramitāpūrī sarvabhūmivibhūṣaṇaḥ /

viśuddhadharmanairātmyaṃ samyagjñānenduhṛtprabhaḥ //

māyājālamahodyogaḥ sarvatantrādhipaḥparaḥ /

aśeṣavajraparyaṅko niḥśeṣajñānakāyadhṛk //

samantabhadraḥ sumatiḥ kṣitigarbho jagaddhṛtiḥ /

sarvabuddhamahāgarbho viśvanirmāṇacakradhṛk //

sarvabhāvasvabhāvāgryaḥ sarvabhāvasvabhāvadhṛk /

anutpādadharmā viśvārthaḥ sarvadharmasvabhāvadhṛk //

ekakṣaṇamahāprājñaḥ sarvadharmāvabodhadhṛk /

sarvadharmābhisamayo bhūtāntamunir agradhīḥ //

stimitaḥ suprasannātmā samyaksaṃbuddhabodhidhṛk /

pratyakṣaḥ sarvabuddhānāṃ jñānārciḥ suprabhāsvaraḥ //

[ pratyavekṣaṇājñānagāthā dvācatvāriṃśat ]

ratnanga

iṣṭārthasādhakaḥ paraḥ sarvāpāyaviśodhakaḥ /

sarvasattvottamo nāthaḥ sarvasattvapramocakaḥ //

kleśasaṃgrāmaśūraikaḥ ajñānaripudarpahā /

dhīḥ śṛṅgāradharaḥ śrīmān vīrabībhatsarūpadhṛk //

bāhudaṇḍaśatākṣepaḥ padanikṣepanartanaḥ /

śrīmacchatabhujābhogo gaganābhoganartanaḥ //

ekapādatalākrāntamahīmaṇḍatale sthitaḥ /

brahmāṇḍaśikharākrāntapādāṅguṣṭhanakhe sthitaḥ //

ekārtho 'dvayadharmārthaḥ paramārtho 'vinaśvaraḥ /

nānāvijñaptirūpārthaś cittavijñānasantatiḥ //

aśeṣabhāvārtharatiḥ śūnyatāratir agradhīḥ /

bhavarāgādyatītaś ca bhavatrayamahāratiḥ //

śuddhaśubhrābhradhavalaḥ śaraccandrāṃśusuprabhaḥ /

bālārkamaṇḍalacchāyo mahārāganakhaprabhaḥ //

indranīlāgrasaccīro mahānīlakacāgradhṛk /

mahāmaṇimayūkhaśrīr buddhanirmāṇabhūṣaṇaḥ //

lokadhātuśatākampī ṛddhipādamahākramaḥ /

mahāsmṛtidharas tattvaś catuḥsmṛtisamādhirāṭ //

bodhyaṅgakusumāmodas tathāgataguṇodadhiḥ /

aṣṭāṅgamārganayavit samyaksaṃbuddhamārgavit //

sarvasattvamahāsaṅgo niḥsaṅgo gaganopamaḥ /

sarvasattvamanojātaḥ sarvasattvamanojavaḥ //

sarvasattvendriyārthajñaḥ sarvasattvamanoharaḥ /

pañcaskandhārthatattvajñaḥ pañcaskandhaviśuddhadhṛk //

sarvaniryāṇakoṭisthaḥ sarvaniryāṇakovidaḥ /

sarvaniryāṇamārgasthaḥ sarvaniryāṇadeśakaḥ //

dvādaśāṅgabhavotkhāto dvādaśākāraśuddhadhṛk /

catuḥsatyanayākāro aṣṭajñānāvabodhadhṛk //

dvādaśākārasatyārthaḥ ṣoḍaśākāratattvavit /

viṃśatyākārasaṃbodhir vibuddhaḥ sarvavitparaḥ //

ameyabuddhanirmāṇakāyakoṭivibhāvakaḥ /

sarvakṣaṇābhisamayaḥ sarvacittakṣaṇārthavit //

nānāyānanayopāyajagadarthavibhāvakaḥ /

yānatritayaniryāta ekayānaphale sthitaḥ //

kleśadhātuviśuddhātmā karmadhātukṣayaṃkaraḥ /

oghodadhisamuttīrṇo yogakāntāraniḥsṛtaḥ //

kleśopakleśasaṃkleśasuprahīṇasavāsanaḥ /

prajñopāyamahākaruṇā amoghajagadarthakṛt //

sarvasaṃjñāprahīṇārtho vijñānārtho nirodhakṛt /

sarvasattvamanoviṣayaḥ sarvasattvamanogatiḥ //

sarvasattvamano 'ntasthas taccittasamatāṃgataḥ /

sarvasattvamanohlādī sarvasattvamanoratiḥ //

siddhānto vibhramāpetaḥ sarvabhrāntivivarjitaḥ /

niḥsandigdhamatis tryarthaḥ sarvārthas triguṇātmakaḥ //

pañcaskandhārthas triṣkālaḥ sarvakṣaṇavibhāvakaḥ /

ekakṣaṇābhisaṃbuddhaḥ sarvabuddhasvabhāvadhṛk //

anaṅgakāyaḥ kāyāgryaḥ kāyakoṭivibhāvakaḥ /

aśeṣarūpasaṃdarśī ratnaketur mahāmaṇiḥ //

[ samatājñānagāthāś caturviṃśatiḥ ]

sarvasaṃbuddhaboddhavyo buddhabodhir anuttaraḥ /

anakṣaro mantrayonir mahāmantrakulatrayaḥ //

sarvamantrārthajanako mahābindur anakṣaraḥ /

pañcākṣaro mahāśūnyo binduśūnyaḥ śatākṣaraḥ //

sarvākāro nirākāraḥ ṣoḍaśārdhārdhabindudhṛk /

akalaḥ kalanātītaś caturthadhyānakoṭidhṛk //

sarvadhyānakalābhijñaḥ samādhikulagotravit /

samādhikāyo kāyāgryaḥ sarvasaṃbhogakāyarāṭ //

nirmāṇakāyo kāyāgryo buddhanirmāṇavaṃśadhṛk /

daśadigviśvanirmāṇo yathāvajjagadarthakṛt //

devātidevo devendraḥ surendro dānavādhipaḥ /

amarendraḥ suraguruḥ pramathaḥ pramatheśvaraḥ //

uttīrṇabhavakāntāra ekaḥ śāstā jagadguruḥ /

prakhyāto daśadigloko dharmadānapatir mahān //

maitrīsaṃnāhasaṃnaddhaḥ karuṇāvarmavarmitaḥ /

prajñākhaḍgadhanurbāṇaḥ kleśājñānaraṇaṃjahaḥ //

mārārir mārajid vīraś caturmārabhayāntakṛt /

sarvamāracamūjetā saṃbuddho lokanāyakaḥ //

vandyaḥ pūjyo 'bhivādyaś ca mānanīyaś ca nityaśaḥ /

arcanīyatamo mānyo namasyaḥ paramo guruḥ //

trailokyaikakramagatir vyomāparyantavikramaḥ /

traividyaḥ śrotriyaḥ pūtaḥ ṣaḍabhijñaḥ ṣaḍanusmrtiḥ //

bodhisattvo mahāsattvo lokātīto maharddhikaḥ /

prajñāpāramitāniṣṭhaḥ prajñātattvatvam āgataḥ //

ātmavitparavitsarvaḥ sarvīyo hy agrapudgalaḥ /

sarvopamām atikrānto jñeyo jñānādhipaḥ paraḥ //

dharmadānapatiḥ śreṣṭhaś caturmudrārthadeśakaḥ /

paryupāsyatamo jagatāṃ niryāṇatrayayāyinām //

paramārthaviśuddhaśrīs trailokyasubhago mahān /

sarvasaṃpatkaraḥ śrīmān mañjuśrīḥ śrīmatāṃ varaḥ //

[ kṛtyānuṣṭhānajñānagāthāḥ pañcadaśa ]

ratnanga

namas te varada vajrāgrya bhūtakoṭi namo 'stu te /

namas te śūnyatāgarbha buddhabodhi namo 'stu te //

buddharāga namas te 'stu buddhakāma namo namaḥ /

buddhaprīti namas tubhyaṃ buddhamoda namo namaḥ //

buddhasmita namas tubhyaṃ buddhahāsa namo namaḥ /

buddhavāca namas te 'stu buddhabhāva namo namaḥ //

abhavodbhava namas te 'stu namas te buddhasaṃbhava /

gaganodbhava namas tubhyaṃ namas te jñānasaṃbhava //

māyājāla namas tubhyaṃ namas te buddhanāṭaka /

namas te sarva sarvebhyo jñānakāya namo 'stu te //

[ iti pañcatathāgatajñānastutigāthāḥ pañca ]

oṃ sarvadharmābhāvasvabhāvaviśuddhavajracakṣuḥ a ā aṃ aḥ | prakṛtipariśuddhāḥ sarvadharmā yaduta sarvatathāgatajñānakāyamañjuśrīpariśuddhitām upādāyeti aṃ āḥ | oṃ sarvatathāgatahṛdayaṃ hara hara | oṃ hūṃ hrīḥ bhagavañ jñānamūrtivāgīśvara mahāvāca sarvadharmagaganāmalasupariśuddhadharmadhātujñānagarbha āḥ ||

[ mantravinyāsaḥ ]

atha vajradharaḥ śrīmān hṛṣṭatuṣṭaḥ kṛtāñjaliḥ /

praṇamya nāthaṃ saṃbuddhaṃ bhagavantaṃ tathāgatam //

anyaiś ca bahuvidhair nāthair guhyendrair vajrapāṇibhiḥ /

sa sārdhaṃ krodharājānaiḥ provācoccair idaṃ vacaḥ //

anumodāmahe nātha sādhu sādhu subhāṣitam /

kṛto 'smākaṃ mahān arthaḥ samyaksaṃbodhiprāpakaḥ //

jagataś cāpy anāthasya vimuktiphalakāṃkṣiṇaḥ /

śreyomārgo viśuddho 'yaṃ māyājālanayoditaḥ //

gambhīrodāravaipulyo mahārtho jagadarthakṛt /

buddhānāṃ viṣayo hy eṣa samyaksaṃbuddhadeśitaḥ //

[ ity upasaṃhāragāthāḥ pañca ]

āryamāyājālāt ṣoḍaśasāhasrikān mahāyogatantrāntaḥpātisamādhijālapaṭalād bhagavattathāgataśākyamunibhāṣitā bhagavato mañjuśrījñānasattvasya paramārthā nāmasaṃgītiḥ parisamāptā ||

ratnanga

༄༅། །འཕགས་པ་ནམ་མཁའ་དང་མཉམ་པ་སྒྱུ་འཕྲུལ་དྲྭ་བ་སྟོང་ཕྲག་བཅུ་དྲུག་པ་རྣལ་འབྱོར་ཆེན་པོའི་རྒྱུད་ཀྱི་བདག་པོའི་ཏིང་ངེ་འཛིན་དྲྭ་བའི་ལེའུ་ལས་ཕྱུང་བ། བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པས་གསུངས་པ། བཅོམ་ལྡན་འདས་འཇམ་དཔལ་ཡེ་ཤེས་སེམས་དཔའི་ཡེ་ཤེས་ཀྱི་སྐུ། དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་སྐུ་གཉིས་སུ་མེད་པ་དོན་དམ་པའི་མཚན་ཡང་དག་པར་བརྗོད་པ། །

>>此 梵本「真實名經」／「誦妙吉祥勝義名」精校最終版（應該是吧... 假設在將來進一步校對中發現有遺漏之處則會貼上），是在梵本原文上逐句逐字參照

梵本舞金剛註

Anthony Tribe, Tantric Buddhist practice in India : Vilāsavajra's commentary on the Mañjuśri-nāmasaṃgīti : a critical edition with annotated translation of chapters 1-5 with introductions, Routledge (New York) 2016.

及 Wayman、Davidson的critical editions，在saṃdhi上进一步作了整理。

>>多處於義有显著差別的，經舆 丹珠爾 中的 文殊友註（寶賢 譯）、無垢友註（等持賢 與 聶·智童 譯）、月官註（桂·天誕 譯）、無垢光註、甘露滴註等相比对，如：

[仁欽曲扎譯] 圓點空六字 -> 圓點空百字 (ṣaḍ- ->śata- ) （合 寶賢譯，及 文殊友、無垢友註等前弘大師註疏）

[仁] 諸佛之大王 -> 諸佛大威光 (-rājaḥ -> -tejaḥ) （合 寶賢譯、月官註，及 文殊友、無垢友註等前弘大師註疏）

[仁]  རྣམ་ཤེས་དོན་ནི་འགོག་པ་འཆང་། -> -འགོག་པར་བྱེད། (-dhṛk -> -kṛt) （合 甘露滴註，及 文殊友、無垢友註等前弘大師註疏）......

>>於第十三品（咒語），按照無垢友註、月官註、那羅因陀羅註、文殊耶舍註、無垢光註、甘露滴註、夏魯·法護賢譯 等，於以下幾處分別確定為：...vajracakṣuḥ; ...sarvadharmā yaduta; ...aṃ āḥ | oṃ sarvatathāgatahṛdayaṃ.

>>禁止以任何形式作商业用途、禁止以任何形式使用此文本盈利。

ratnanga

考虑到论坛上粘贴可能会有漏字现象，请以此pdf版为准。

zgq15

感谢！！！

astrol

感谢！